अहिल्यानगर (प्रकाश थोरात):- सार्वजनिक बांधकाम विभाग, अहिल्यानगर येथे उपकार्यकारी अभियंता श्री. कुंडलिक शेळके यांचा निवृत्ती समारंभ मोठ्या उत्साहात व स्नेहभावाने पार पडला. या वेळी त्यांच्या कार्यकाळातील उल्लेखनीय सेवेला सन्मान देण्यात आला. 
समारंभ प्रसंगी सार्वजनिक बांधकाम विभागाचे उपकार्यकारी अभियंता श्री. उत्तम बोरुडे आणि उपविभागाचे उपअभियंता श्री. शशी सुतार यांनी श्री. शेळके दांपत्याचा पुष्पगुच्छ, शाल व श्रीफळ देऊन गौरव केला. यावेळी बोलताना श्री बोरुडे यांनी शेळके यांचे प्रशासकीय कार्य, बांधकामातील काटेकोर अंमलबजावणी व सहकाऱ्यांशी असलेले सौहार्दाचे संबंध याचे विशेष कौतुक केले.
या समारंभास सेवानिवृत्त उपअभियंता श्री. प्रकाश तीपुळे, शाखा अभियंता श्री. सतीश शिंदे तसेच विभागातील इतर अधिकारी व कर्मचारी मोठ्या संख्येने उपस्थित होते. उपस्थित सर्वांनी श्री. शेळके यांना पुढील आयुष्यासाठी शुभेच्छा दिल्या.शेवटी श्री. शेळके यांनी आपल्या निवृत्तीच्या प्रसंगी सहकाऱ्यांचे व वरिष्ठांचे आभार मानून, विभागातील सहकार्य व सहवासाचे स्मरण करत भावनिक भाषण केले. समारंभात बोलताना श्री. शेळके भावुक होत म्हणाले, “या विभागात माझ्या सेवेचा प्रवास अत्यंत संस्मरणीय ठरला. इथले अधिकारी, कर्मचारी हे माझं दुसरं कुटुंबच झाले होते. अनेक चढ-उतार, ताणतणाव यांना सामोरे जात आम्ही काम केलं. पण जेव्हा सहकाऱ्यांचा पाठिंबा मिळतो, तेव्हा कोणतीही जबाबदारी पार पाडणं सहज शक्य होतं. या प्रवासात अनेक गोष्टी शिकायला मिळाल्या. आता जेव्हा विभागातून बाहेर पडतोय, तेव्हा मनात समाधान आहे की मी काम करत असताना सर्वांना बरोबर घेतले प्रामाणिकपणे शासनाची सेवा केली. त्यांच्या या शब्दांनी उपस्थितांचा कंठ दाटून आला. शेवटी त्यांनी सर्व सहकाऱ्यांचे, वरिष्ठांचे आणि कुटुंबियांचे आभार मानले.
